Inni í blíðunni

Aumingjans litla Liljan okkar er ekki brött núna.  Á föstudaginn var hún komin með hita og bólgna efri vör.  Sá að hún var sár í munninum og hún vildi ekkert borða. 

Á laugardaginn fórum við hjónin löngu æfinguna okkar að venju, sem var stutt að þessu sinni, bara 19 km og nú er svo komið að við finnum ekkert fyrir svoleiðis smáræði.  Þetta er svona rólegheitavika í prógramminu okkar eftir tvær strembnari vikur. 

Ég vissi að ég yrði að mestu inni og til að mygla ekki alveg í blíðunni fór ég aldrei þessu vant í pils og sætan bol í staðinn fyrir 'heima' buxurnar.  Lilja sat svo í fanginu á mér alveg domm þegar fyrsta gusan kom.  Hitti svona laglega ofan í hálsmálið á krúttlega bolnum mínum, ekki mjög þokkafullt.  Önnur sturta og nú var bara farið í gömlu 'heima' buxurnar og næsta sólarhringinn gat litla skinnið varla haldið niðri vatnsdropa.

Í morgun tókum við Þórólfur fyrstu maraþon pace æfinguna okkar úti.  Hlupum 10 km að heiman, niður að Tjörn og heim aftur, tíminn var 45:30.  Hugsuðum nú til þess að síðasta sumar var ég að rembast við að komast undir 45 og nú er maður að taka þetta bara nokkuð létt á æfingu, gaman.

Skildi Þórólf eftir á vaktinni og skrapp til hennar Ástu ofurglennu í 'smá' afmælisboð eða þannig.  Eftir tveggja tíma massíva hleðslu rúllaði ég heim aftur með sýnishorn af veitingunum handa elskunni minni . 

Lilja er farin að halda niðri mat en er ennþá algjörlega eins og drusla.  Liggur í fanginu á okkur til skiptis og er í hálfgerðu móki.  Finnst hún nú samt aðeins vera að hjara við núna.

Kíktum á úrslitin í París og Neil hljóp á 2:34, glæsilegt!

Athugasemdir

[Ásta (IP-tala skráð) 6.4.2008 kl. 23:21]

Þið hjónin eigið eftir að gera svoooo góða hluti í Köben, glæsileg æfing hjá ykkur í morgun.  Takk fyrir samveruna í dag.

[Eva Margrét Einarsdóttir, 7.4.2008 kl. 15:22]

Takk sömuleiðis!