Sveitalíf

Hrökk upp við símann klukkan hálf tólf í gærkvöldi (já, já vorum löngu sofnuð...) og sé að þetta er númerið hjá Sverri.  Smá í magann.  Ég svara og heyri titrandi röddina í Gabríel kalla 'Mamma, mamma...'. Mikill hjartsláttur.  'Mamma, ég var að veiða með Sverri frænda og ég fékk 8 punda lax og ég er að fara að bíta uggann af honum.  Mamma, þetta er Maríulaxinn minn!!!'. 

Allir ætla að vera með í Jökulsárhlaupinu og í gær var ég með smá fiðring, æiii það væri nú gaman að vera með.  Svo heyrði ég í Orra bróður og hann ætlar að hlaupa líka...  Fór með Þórólfi út að skokka eftir vinnu og prísaði mig sæla að komast litla hringinn minn skammlaust og öll löngun í 30 km + hlaup rauk út í veður og vind.  Tókum svo aðeins á því í salnum á eftir, aðeins að lyfta, magaæfingar og svoleiðis.  Endaði á upphífingum og nú ætla ég að verða góð í þeim.  Kreisti út úr mér 22 upphífingar í þrem settum, stefnan sett á 20 í einu.

Athugasemdir

[Agga, 25.7.2008 kl. 13:47]

22 upphífingar! Vá, ég held að ég geti 1/3 úr upphífingu

[Eva Margrét Einarsdóttir, 25.7.2008 kl. 15:37]

Mínar upphífingar eru þannig að ég fer með hökuna upp fyrir stöng og slaka niður fyrir 90 gráður með olbogana áður en ég hífi mig upp aftur.  Bara svo allt sé á tæru og ég verði ekki kærð fyrir ýkjur...

[Fjóla Þorleifs (IP-tala skráð) 25.7.2008 kl. 22:41]

Eva mín það gleymir enginn upphífingum þínum í Austurbæjarskóla hérna um árið með NFR þetta er bara þannig að þetta liggur svona misjafnlega fyrir mönnum.

[Eva Margrét Einarsdóttir, 28.7.2008 kl. 09:52]

Það var nú gaman hjá okkur í NFR...