Jól 2008

Enn eitt gott og viðburðarríkt ár að baki hjá okkur á Dyngjuveginum.

Gabríel er glaður og duglegur strákur, stendur sig vel í skólanum og á fullt af góðum vinum.  Það er nú samt fótboltinn sem á hug hans allan, hann mætir á allar æfingar með Þrótti og þess á milli er hann í boltanum með félögunum.  Hann uppskar líka eins og hann sáði, fékk viðurkenningu fyrir bestu ástundun á uppskeruhátíð Þróttar í haust. 

Lilja er byrjuð á leikskólanum Hlíðarenda og er alsæl þar.  Hún er að sjálfsögðu búin að vefja öllum starfsmönnunum utan um litlu fingurna sína en glaðlyndara barn er erfitt að finna.  Hún brosir og syngur allan daginn, ekki það að hún sé skaplaus því hún getur alveg látið í sér heyra ef henni mislíkar eitthvað.  Okkur foreldrunum til mikillar gleði er hún líka hætt að vakna upp úr 5 á morgnana og sefur núna eins og sveskja þangað til heimilisfólkið fer á fætur, dæs...

Þetta hefur verið stórt hlaupaár hjá okkur hjónum.  Tókum Kaupmannahafnarmaraþonið í nefið á afmælisdaginn minn, frábær upplifun sem við munum aldrei gleyma.   Frúin fór svo í framhaldinu í stífar æfingar fyrir Laugavegs hlaupið og náði að landa sigrinum á síðustu bensíndropunum, ógleymanlegt. 

Stelpurnar á heimilinu skelltu sér í stutta ferð til Norge í sumar á meðan strákarnir fóru á fótboltamótið í Eyjum.  Frúin notaði svo megnið af árinu til að skipuleggja óvissuferð fyrir húsbóndann í tilefni 5 ára brúðkaupsafmælisins núna í nóvember.  Steinhélt kjafti og stakk undan mjólkurpeningum í níu mánuði og plottið tókst fullkomlega, 3 tímum fyrir brottför til New York leysti hún loks frá skjóðunni.  Chinatown, Empire State, keppnishlaup í Central Park og  þyrluflug var meðal þess sem boðið var uppá.

Við horfum björtum augum á framtíðina, fullviss um að næsta ár verði gæfuríkt.

Gleðileg jól og farsælt komandi ár!

Kveðja, Þórólfur, Eva, Gabríel og Lilja.

Athugasemdir

[Sóla (IP-tala skráð) 25.12.2008 kl. 23:46]

Gleðilega hátíð!

[Börkur (IP-tala skráð) 26.12.2008 kl. 22:59]

Hafið það gott um jólin, tökum vel á því á nýju ári.

Verð væntanlega fjarri um þessi áramót og kemst því ekki á nánast árlega sprengingar á hæðinni við Áskirkju og helling af konfekti hjá ykkur á eftir ;) 

[Jóhanna (IP-tala skráð) 26.12.2008 kl. 23:26]

Gleðilega

[Jóhanna (IP-tala skráð) 26.12.2008 kl. 23:28]

Gleðilega jólarest og farsælt nýtt ár. Það er svo hressandi að þekkja svona hamingjusamt og glatt fólk eins og ykkur, svo stel ég líka smá orku þegar ég hitti ykkur.

[Bibba (IP-tala skráð) 27.12.2008 kl. 19:32]

Gleðileg jól kæru vinir

[Eva Margrét Einarsdóttir, 28.12.2008 kl. 09:00]

Takk fyrir.  Hlakka til að eiga góðar stundir með ykkur öllum